KLASSİK CİNNABON ROLL-LAR

Roll deyəndə cinnabon roll ağlıma gəldiyi üçün ilk bloqda paylaşacağım yazılardan biri bu olacaqdı deyə düşünürdüm, amma iş elə gətirdi ki, ani emosiyalarla pizza roll-lar ağ şokoladlı soslu moruqlu roll reseptləri daha önə düşdü. Üzərinə də bir şəkildə cinnabon roll-ları xatırladan şokolad babkalar yazısı gəlincə, cinnabon yazısı bugünə qədər qaldı. Bu arada ən çox istək alan yazı olduğunu da deməliyəm, hətta bloqun axtarış sistemində də adı ən çox yazılıb axtarılan reseptdir.

Reseptin də tarixçəsindən biraz söz açım, cinnabon roll-u ilk Qazaxıstanda yemişdim, o zaman bizdə hələ Cinnabon yox idi, evə döndüyümdə ilk iş resepti axtardım və bişirdim. Ups.. Alınan cinnabon roll deyildi, darçın qatılmış bulka idi. Uzun müddət yenidən cəhd eləmədim, illər sonra Todd Wilbur-un Top secret recipes step by step kitabında cinnabon roll-un klassik variantının klonunu tapdım. Biraz adaptasiya edərək (bəzi elementlər bizdə yoxdur) bişirdim, amma istədiyim nəticəni ala bilmədim, aşırı şirinliyi ilə yanaşı bəzi nüanslar bizim ağız dadımıza uyğun olmadı. Bu problemləri də maksimum çözməyə çalışaraq, yeni öz ağız dadımıza uyğun resept hazırladım.

ciy-cinnabon-roll-lar-darcinli

Reseptin müsbət tərəflərindən danışım, ingilis dilində bir ifadə var freezer-friendly, yəni dondurucu dostu. Bu resept də elələrindəndir, zamanınız olanda düzəldib, hazır şəkildə dondurucuya qoyub, 1 ay müddətində saxlaya bilərsiz, zamanı gəldiyində isə, azacıq donunu açıb sonra bişirə bilərsiniz. Beləliklə, hər zaman evinizdə təzə sobadan çıxmış, isti-isti və darçın qoxulu roll-lar ikram edə bilərsiniz.

labne-pendirli-sos-roll-lar-ucun

klassik-cinnabon-roll

Klassik cinnabon roll, yəni darçınlı yumru
Bu reseptdən 9 iri roll alınır.

Xəmir üçün
• 4½ st. un (çörək unu olması daha yaxşıdır, üzərində çörək üçün olan yazılı və ya Makfa, Tsar kimi markalar alın)
• ¾ ç.q. duz
• ½ st. süd
• ½ st. su
• ½ st. ağ şəkər tozu
• 2 yumurta
• 1 ç.q. instant maya
• 60 qr kərə yağı (otaq temperaturunda)
• Qaşığın ucunda azacıq soda

İçlik üçün
• 1 st. açıq qəhvəyi şəkər tozu, şəkəri 1¼ st-a qədər artıra bilərsiniz (ağ şəkərə dəyişmək olmaz, hətta məsləhət olan tünd qəhvəyi şəkərdən istifadə olunmasıdır, amma onu bizim marketlərdə tapmaq çətindir. Burada bir haşiyə çıxmaq istərdim, mən şəkəri əvvəlcə mətbəx prosessorunda azacıq xırdalayıram, əks halda tam ərimir və şirniyyatın içində də xırçıldayır, Amerikada bucür problemlərə görə şəkərlər iri və xırda olana bölünür, bizdə isə hamısı iridir, ona görə bunu mexaniki üsulla eləmək lazım gəlir.)
• 2 ç.q darçın
• 60 qr. kərə yağı (otaq temperaturunda)

Pendirli sos üçün
• 120 qr. labne pendiri (İçim Ülker dadının daha miyanə olduğuna və suyunun az olduğuna görə məsləhətlidir)
• 60 qr. kərə yağı (otaq temperaturunda)
• ½ ç.q. vanil ekstraktı və ya 1 vanil çubuğunun toxumları (əgər yoxdursa, şəkərli vanilindən istifadə edə bilərsiniz)
• 1 ç.q limon suyu

Hazırlanma qaydası:

  1. Unu, şəkər tozunu, duzu, sodanı və mayanı bir qabda qarışdırın. (Diqqət: Mayanız instant deyilsə, bucür qarışdırma düzgün deyil)
  2. Başqa bi qabda yumurtaları çalın, üzərinə su və südü tökün. Yaxşıca qarışdırdıqdan sonra unlu qarışımın üzərinə tökün. Xəmir yoğurun.
  3. Yoğurduqdan sonra xəmirin üzərinə xəmir üçün nəzərdə tutulan 60 qr. yağı tökün, bu hissəsi ən əziyyətli hissəsidir. Yağ təzədən xəmirə yeritmək lazımdır. Yaxşı yoğurduqdan sonra xəmirin bir qaba qoyub, üzərini streç folyo ilə bağlayın, soyuducuya yerləşdirin. Bir gecə orda keçirməlidir. Bu mütləqdir! Əgər tələsirsinizsə belə, soyuducuda ən az 5 saat qalmalıdır. Bunu Cinnabonda da belə etdiklərinə əmin olun 🙂
  4. Gecəni soyuducuda keçirmiş xəmiri çıxarın. 10 dəqiqə isinsin, sonra yaymağa başlayın, xəmirin müqavimət göstərdiyini hiss edəcəksiniz, yəni yayılmayacaq. 10 dəqiqə əlinizi çəkin.
  5. Xəmirin istirahət etdiyi 10 dəqiqədə şəkəri əgər xırdalayacaqsınızsa, xırdalayın 2 x.q. darçınla qarışdırın.
  6. Xəmiri yaymağa başlayın, kvadrat şəklində 45x60sm ölçüsündə yayın, çox vaxt 45x30sm kimi məsləhət görürlər, amma o zaman mən də şəkildə gördüyünüz kimi çox qatlı alınmır, daha qalın qatlarla olur, bu da istər-istəməz dadına da təsir edir.
  7. Açdığınız xəmirin üst tərəfinə yağı çəkin, hər yerinə çatmasına diqqət edin. Üzərinə şəkərli-darçınlı qarışımı səpin, yenə də hər yerinə çatmasına diqqət edin.
  8. 45 sm-lik hissəsini 60 sm-lik tərəfinə doğru rulet şəklində ehmalca bükməyə başlayın. Yəni, son nəticə əlinizdə 45 sm-lik rulet alınmalıdır.
  9. Ruleti çox iti bıçaqla maksimum səliqə ilə 5 sm-lik roll-lar kəsin, yəni 9 roll alınacaq. Kvadratik və ya yumru qaba bir-birinə toxunmayacaq, amma yenə də sıx şəkildə yerləşdirin. Nümunə kimi, bişməmiş olan yumruların şəklinə baxın.
  10. Üzərini streç folyo ilə bükün, 1 saat yenidən mayalanması üçün isti yerə yerləşdirin. Sobanızı 190Cº qızdırın.
  11. 1 saat sonra üzərini açın, sobaya yerləşdirin. 40-45 dəq. sonra şəkildəki kimi qızılı olanda sobadan götürün.
  12. Ara müddətdə yağı, labneni, limon suyunu və vanili bir qaba töküb, mikser yardımı ilə və ya əlinizlə çalın. Sosunuz hazırdır.
  13. Sobadan çıxan roll-ları 10 dəq. sonra üzərinə pendirli sosdan qoyub servis edin.

Saxlama müddəti və şəraiti:

Bu kimi mayalı xəmirlər bişdiyi gün daha yaxşıdırlar, hətta bişdiyi saatlarda. Saxlamaq istəyirsinizsə, yazıda qeyd etdiyim kimi, çiy şəkildə dondurucuda saxlayın. Mən, şəkil üçün bişirdiyimdə hamısını bişirdim, amma digər vaxtlarda yeyəcək neçə nəfər varsa, o sayda bişirib, geri qalanını dondurucuda saxlayıram. Başqa bir vaxtda yemək istəsəniz, əvvəl qızdırın, sonra yeyin. İlk bişdiyi andakı kimi olmasa belə, qızdırdıqda müəyyən qədər təravətliliyini geri qaytarır. Qızdırmaq üçün sobanı əvvəlcə 180Cº qoyun, qızdıqdan sonra içinə qoyun və ya mikrodalğalı soba istifadə edə bilərsiniz.

Klassik cinnabon roll-larınız nuş olsun!

Şərhlər

  1. Ellerinize sagliq,xeyli vaxtdi saytinizi teqib edirem reseptlerinizi cox beyendim. Qurbetde yasayan biri olaraq deyim ki buralarda cox mehsur olan reseptleri secib tanidirsiz. Aferin size! Son bir elavemi de eliyim. Men de bu cinnamon rollari adeten masinda yogurdugum ucun instant mayadan istifade edirem amma deyilene gore bu tarifde aktiv quru maya ve tam yagli sud olmazsa olmazlardir. O zaman soyuducuda saxlamaq da asanlasir. Islerinizde muveffeqiyyetler

  2. Saturday Menu

    Pari xanım, çox təşəkkür edirəm kommentiniz üçün. Çox xoş oldu ki, izləyirsiniz və komment yazırsınız. Süd və maya məsələsində məsələ belədir, mən adını çəkdiyim kitabda Cinnabon roll-un klon resepti (Cinnabonun icazəsi və nəzarəti ilə) verilib, orda ümumiyyyətlə süd istifadə olunmur. Ancaq sudur. Mən bir-neçə dəfə sınaqdan keçirib, 50/50 istifadə etmənin ən optimal yol olduğunu düşündüm, südlü və quru mayalı versiyası ağ şokolad soslu moruqlu roll-lardakı xəmirdir. O xəmir daha yumşaq, daha bulkavari alınır. Biraz cinnabon roll-un sərtliyini qazanması üçün sudan istifadə olunub.
    Aktiv quru maya məsələsinə gələndə isə, instant mayanın istifadə etməyim üçün iki səbəb var, biri yenə də mənim adaptasiya etdiyim mənbənin instant maya tərəfdarı olması, eyni zamanda mən xəmiri hər iki maya ilə görmüşəm, ciddi fərq yoxdur, biraz hissiyyatda fərq olur, quru aktiv maya mənə həmişə daha təbii kimi gəlir. İkinci isə, son zamanlar burada aldığım quru mayalardan ciddi narazı qalmağım. Mən də normalda instant maya sevən biri deyiləm, hətta reseptlərə diqqət etsəniz, ilk instant mayalı resept budur. Amma burda onsuz da marka qıtlığı var və aldığım son 3 paket soyuducuda yatır. Ona görə digər reseptlərdə də instant mayaya keçməli olacam.
    Yenə də quru aktiv maya istifadə etmək istəyənlər üçün yazım ki, mayanı 2 ç.q. istifadə etməlidirlər və eyni zamanda mayeləri yüngül qızdırıb, 40 dərəcə təxminən onun içinə qatıb, sonra una qatmalıdırlar.
    Hörmətlə,

Leave a Reply

Your email address will not be published. Required fields are marked *