XURMALI & QOZLU QALET

Delicious jurnalının son nömrəsində almalı və çeddar pendirli piroq reseptinin başlığı diqqətimi çəkdi. Çox iddialı idi. Əgər bu nömrədən bircə resept bişirsəniz, ”məhz bu resepti bişirin” yazmışdılar. Mən də bu iddianı təkrar edə bilərəm, əgər bloqumdan cəmi bircə resept seçəsəksinizsə, o resept mütləq bu resept olmalıdır – Alice Waters-in xurmalı və qozlu qaleti. 🙂 Alice Waters məşhur Chez Panisse restoranının sahibi, çox sevdiyim desert şefləri və müəllifləri David Lebovitz-in və Claire Ptak-ın müəllimidir. Resepti “Gourmet Traveller” jurnalında gördüyümdən bəri Alice Waters imzalı bu piroqu mütləq sınamalıyam deyə düşündüm. Həm də reseptdə sevdiyim tandem var. Alice fransız mətbəxi ilə Orta Şərq mətbəxini birləşdirib mükəmməl vəhdət yaradıb. Xurmanın şirinliyi, portağalın turşməzəliyi, pate brissedəki kərə yağının nəfis ətri, qozun və kəpəkli unun verdiyi xırçıltı musiqi kimidir – həm də heç vaxt bitməyini istəmədiyiniz və çox zəngin ahəngli musiqi.

xemirrXurmalı və qozlu qalet

Xurmalı və qozlu qalet
Bu resept Gourmet Traveller jurnalının 2014 aprel sayından adaptasiya olunmuşdur.
8 nəfər üçün nəzərdə tutulub.

Xəmir üçün:
• 2 st. kəpəkli un (normal undan da istifadə edə bilərsiniz,sadəcə kəpəkli un daha kövrək edir)
• 1 ç.q. şəkər tozu
• ¼ ç.q. duz
• 150 qr. kərə yağı (kubiklərə doğranmış və buzlanmış şəkildə)
• 1 yumurta
• ¼ st. çox soyuq su

İçlik üçün:
• 2 st. yumşaq xurma (iran və ya bağdad xurması adlandırdığımız xurma çeşidindən)
• 1 x.q. ərinmiş kərə yağı
• ½ st. iri xırdalanmış qoz
• 1 portağalın rəndələnmiş qabığı
• ½ st. təzə sıxılmış portağal suyu
• 1 ç.q. portağal çiçəyi ekstraktı
• 1 x.q. bal

Üzəri üçün:
• 2 x.q. ərinmiş yağ
• ¼ st. şəkər tozu

Portağal çiçəyi ekstraktı orta şərq mətbəxinin simvolizə edən dadlardan biridir. Bu piroqda onu tamamilə istifadə etməyə də bilərsiniz. Və ya Alice Waters-in piroqla bağlı fərqli bir təklifi də var. Daha Orta Şərq üslubunda dad əldə etmək istəyirsinizsə portağal çiçəyi ekstraktı əvəzinə 2 x.q. gül suyu, ½ x.q. hil və ½ x.q. darçın tökə bilərsiniz.

Hazırlanma qaydası:
1. Un, şəkər və duzu bir-birinə qarışdırın, üzərinə kərə yağını əlavə edib, yağlar əriməmək şərtilə ovun.
2. Üzərinə suyu və yumurtanı əlavə edib xəmir yoğurun. Kərə yağlarının əriməməsi üçün diqqət edin. Ununuz kəpəkli olarsa, bu mərhələdə xəmir kifayət qədər çətinliklə birləşəcək.
3. Xəmiri iki eyni hissəyə ayırın, yumrulayıb streç folyoya bükün, hər ikisinin üzərindən yüngülcə basın və minimum 1 saatlıq soyuducuya yerləşdirin.
4. Xurmaları mətbəx prosessoru və ya blender vasitəsilə püre halına gətirin. Püreni orta böyüklükdə qaba qoyub üzərinə yağ, qoz, portağal qabığı və şirəsi, əgər istifadə edəcəksinizsə, portağal çiçəyi ekstraktı, bal və qaşığın ucunda azacıq duz əlavə edib yaxşıca qarışdırın.
5. Hər xəmiri təxminən 35 sm diametrində 5 mm qalınlığında yumru şəkildə yayın. Bişirmə kağızının üzərinə qoyun və 30 dəqiqəlik soyuducuya yerləşirin.
6. Sobanızı 200℃ qızdırın.
7. Xəmiri soyuducudan çıxarın xəmiri bişirəcəyiniz qaba yerləşdirin, xurmalı qarışığı kənarında 2,5 sm boşluq buraxaraq xəmirin üzərində eyni qalınlıqda çəkin. Fırça ilə 2,5 sm-lik boşluğa su çəkin. Digər xəmiri üzərinə çevirin.
8. Kənarlarını çəngəllə əzərək naxış verin. Üzərinə şəkildə gördüyünüz kimi bıçaqla kəsiklər atın. Fırça ilə əridilmiş kərə yağını üzərinə çəkin və şəkər tozunu səpin. Sobada 30-40 dəqiqə üzəri qızaran qədər bişirin.

Servisi:
Otaq temperaturunda servis olunmalıdır.

Saxlanma qaydası:
2-3 gün ağzı qapalı şəkildə otaq temperaturunda saxlamaq mümkündür.

Xurmalı və qozlu qaletiniz nuş olsun!

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir